लण्डन असोज २६ ।
प्रवासी नेपालीहरुको छाता संगठन गैरआवासीय नेपाली संघ एनआरएनएलाई राजनीति भन्दा माथि राखेर व्यावसायिक ढंगले सञ्चालन गरिनुपर्नेमा यसका संस्थापक तथा अग्रज व्यक्तित्वहरुले सुझाव दिएका छन् ।
गैरआवासीय नेपाली दिवस एनआरएन डे का अवसरमा संस्थाको बालुवाटारस्थित सचिवालयमा आयोजित कार्यक्रमका वक्ताले नेपालको आर्थिक विकास र समृद्धिका लागि भूमिका खेल्ने उद्देश्यका साथ स्थापना भएको संस्थाको महत्व र गरिमालाई कायम राख्न अगुवाहरुलाई आग्रह गरेका हुन् । पछिल्ला वर्ष एनआरएनभित्र राजनीतिक प्रभाव बढेको र संस्थाका कतिपय गतिविधि पारदर्शी र प्रभावकारी हुन नसकेको भनी गुनासो बढेको भन्दै एनआरएनए आगुवाहरुले यस किसिमका क्रियाकलाप बन्द गरेर संस्थालाई साझा चौतारीका रूपमा अघि बढाइनुपर्नेमा उनीहरुको सुझाव छ ।
एनआरएनएका संस्थापक अध्यक्ष डा उपेन्द्र महतोले संस्थालाई व्यावसायिक ढंगले अघि बढाउनुपर्ने बताए । उनले नेपाललाई समृद्ध राष्ट्र बनाउने अभियानलाई कसैले रोक्न नसक्ने बताए । निर्वाचनका सन्दर्भमा केही विषय उठे पनि बाँकी समय पूरै एनआरएनएको ध्यान नेपालको आर्थिक विकासमा केन्द्रित हुनुपर्नेमा जोड दिए । पूर्वअध्यक्ष जीवा लामिछाने संस्थाभित्र विगत लामो समयदेखि केही गलत किसिमका गतिविधि बढेको र यसले नकारात्मक सन्देश गइरहेको भन्दै सुदृढ र प्रभावकारी बनाइनुपर्ने उल्लेख गरे ।
एनआरएनएका अध्यक्ष कुमार पन्तले संस्था स्थापना भएको १८ वर्षमा थुप्रै उपलब्धिमूलक काम भएको दाबी गरे । संस्थाको आगामी नेतृत्वका लागि छिट्टै अधिवेशन तथा विश्व सम्मेलन सञ्चालनका लागि पहल गरिने बताए । एनआरएनएका अध्यक्षका प्रत्यासी कुल आचार्यले संस्थाभित्र पछिल्ला दिनमा मौलाउँदै गएका गतिविधि रोकेर संस्थाको गरिमालाई कायम राख्न सबैले ध्यान दिनुपर्ने खाँचो औँल्याए । उनले नेपाल सरकारसँग समन्वय र सहकार्यका साथ संस्थालाई प्रभावकारीरूपमा अघि बढाउने उल्लेख गरे ।
अर्का अध्यक्षका प्रत्यासी डा बद्री केसीले संस्थाको आदर्श र सिद्धान्तनिष्ठ भएर राजनीतिभन्दा माथि उठेर संस्थालाई अघि बढाउन सबैको ध्यान जानुपर्नेमा जोड दिए । विदेशमा बसोबास गर्ने नेपाली राजनीति र जात धर्ममा विभाजित भए देशको आर्थिक विकासमा समस्या हुने भन्दै यस्ता विषयले एनआरएनएलाई असर नपर्ने उनको भनाइ थियो । एनआरएनए अध्यक्षका प्रत्याशी रबीना थापाले नेपालको विकास र समृद्धिका लागि विदेशमा बस्ने नेपालीले लगानी बढाएर देशप्रतिको भाव बढाउन जरुरी भएको बताइन् ।