सरकारले ६ वटा संवैधानिक आयोगमा सचिव तोकेको छ । संघीय मामिला तथा सामान्य प्रशासनमन्त्री लालबाबु पण्डितले आइतबार मन्त्रालयका ६ सहसचिवलाई नै ती आयोगमा सचिवको रुपमा काम गर्ने गरी जिम्मेवारी दिएका हुन् ।
मन्त्रालयका अनुसार दलित आयोगमा पुरुषोत्तम नेपाल, समावेशी आयोगमा सुरेश अधिकारी, मुस्लिम आयोगमा केदारप्रसाद पनेरु, मधेसी आयोगमा भूपाल बराल, आदिवासी जनजाति आयोगमा रुद्रसिंह तामाङ र थारु आयोगमा रुपनारायण भट्टराईलाई सचिवको रुपमा काम गर्न जिम्मेवारी दिइएको हो ।
मन्त्रालयका प्रवक्तासमेत रहेका सुरेश अधिकारीका अनुसार सचिवहरुलाई आयोगका लागि आवश्यक पर्ने कार्यालय, फर्निचर, कर्मचारी र मापदण्डलगायत तयारी गर्ने जिम्मेवारी दिइएको छ । यसअघि नै सामान्य प्रशासन मन्त्रालयले सबै आयोगमा करिब ३० जना निजामती कर्मचारी रहने गरी संगठन तथा व्यवस्थापन सर्वेक्षण (ओएन्डएम) गरिसकेको छ ।
अधिकारीका अनुसार ओएन्डएममा सहसचिव नै आयोगको सचिव रहने व्यवस्था गरिएको छ ।
