काठमाडौं सेप्टेम्बर १३ ।
महिला साफ च्याम्पियनशिप फुटबलको इतिहासमा भारतले पहिलो हार बेहोरेको छ ।
नेपालमा चलिरहेको छैटौँ संस्करणको च्याम्पियनशिपमा बङ्ग्लादेशले भारतलाई तीन–शून्य गोलले हराएको हो । योसँगै बङ्ग्लादेशले भारतलाई पहिलो पटक हराएको छ ।
दशरथ रङ्गशालामा भएको खेलमा बङ्ग्लादेशका लागि मोसमात सिराज जाहान सोप्नाले दुई र कृष्णारानी सरकारले एक गोल गरे । जितसँगै बङ्ग्लादेश समूह विजेता बन्दा भारत भने उपविजेता बनेको छ । योसँगै सेमिफाइनल समीकरण पूरा भएको छ ।
समूह बी बाट नेपाल र भुटान सेमिफाइनलमा पुगिसकेका छन् । नेपालले अब फाइनल प्रवेशका लागि भारतसँग खेल्नेछ ।
