बेलायत – विश्व कीर्तिमान कायम गर्ने पर्वतारोही तथा ‘प्राइड अफ ब्रिटेन’ विजेता हरि बुढामगर, विश्वमै पहिलो पटक सातै महादेशका अग्ला शिखर (सेभेन समिट) चुम्ने प्रयास अन्तर्गत आफ्नो अन्तिम आरोहणका लागि अन्टार्क्टिका आइपुगेका छन्।

पर्वतारोहणको क्षेत्रमा अर्को नयाँ कीर्तिमान रच्ने लक्ष्यका साथ, हरि बुढामगर सातै महादेशका सात अग्ला शिखर (सेभेन समिट) आरोहण गर्ने विश्वकै पहिलो ‘घुँडा माथिबाट दुवै खुट्टा काटिएका’ (double-above-knee amputee) व्यक्ति बन्नका लागि आफ्नो अन्तिम यात्रा सुरु गर्दैछन्।

ऐतिहासिक र कीर्तिमानी प्रयासको अन्तिम चरणका लागि हरि बुढामगर अन्टार्क्टिका आइपुगेका छन्। उनी पृथ्वीका प्रत्येक महादेशका सर्वोच्च शिखरहरू सफलतापूर्वक आरोहण गर्ने पहिलो ‘घुँडा माथिबाट दुवै खुट्टा काटिएका’ व्यक्ति बन्ने अन्तिम तयारीमा छन्।

यस आरोहणका मुख्य साझेदार DIGI2AL लगायत अन्य संस्थाहरूबाट अन्तिम समयमा आर्थिक सहयोग प्राप्त गरेपछि, ‘प्राइड अफ ब्रिटेन’ विजेता हरि बुढामगर डिसेम्बर ३०, २०२५ मा अन्टार्क्टिकाको युनियन ग्लेशियर क्याम्प आइपुगेका छन्। मौसमले साथ दिएमा, उनले सन् २०२६ को जनवरी १ तारिखबाट माउन्ट भिन्सन (४,८९२ मिटर) को आरोहण सुरु गर्नेछन्। यो शिखर उनको ‘सेभेन समिट’ अभियानकै सबैभन्दा दुर्गम र चिसो हिमाल हो।

हरिसँग यसअघि नै धेरै विश्व कीर्तिमानहरू छन्। सन् २०२३ मा सगरमाथाको सफल आरोहण गरी उनी ‘घुँडा माथिबाट दुवै खुट्टा काटिएका (Double above-knee amputee)’ वर्गमा सगरमाथा चुम्ने पहिलो व्यक्तिको रूपमा गिनिज वर्ल्ड रेकर्ड कायम गर्न सफल भएका थिए। अब उनी सातै महादेशका सात उच्च शिखरहरू आरोहण गर्ने पहिलो यस्तो व्यक्ति बनेर अर्को ऐतिहासिक सफलता थप्ने योजनामा छन्।

सातमध्ये ६ वटा शिखर आरोहण गरिसकेका हरिको यो अन्तिम यात्रा दक्षिण ध्रुवबाट मात्र १,२०० किलोमिटर टाढा छ। उनले -४०°C सम्मको ठिही, तीव्र हावा र खतरनाक हिमाली अवस्थाको सामना गर्नुपर्नेछ। ठाडा भिरालो बाटो र बरफका मैदानहरू पार गर्न उनले कृत्रिम खुट्टा (प्रोस्थेटिक लेग्स) र आफ्नो सहनशक्तिको अन्तिम परीक्षा दिनुपर्नेछ। अन्टार्क्टिकाको कठोर वातावरणसँग जुध्न उनले विशेषज्ञहरूसँग मिलेर विशेष खालको नयाँ खुट्टा र पञ्जा (Sockets) समेत तयार पारेका छन्।

“अन्ततः अन्टार्क्टिका आइपुग्दा म धेरै उत्साहित छु। अपाङ्गताका कारण मेरा लागि चुनौतीहरू अरूभन्दा बढी छन्। विशेष गरी माउन्ट भिन्सनमा फ्रस्टबाइट (औँलाहरू जम्ने) को जोखिम बढी छ किनकि म अरू आरोहीभन्दा हातको प्रयोग धेरै गर्छु। मेरा लागि थप अंगहरू गुमाउने जोखिम मोल्न सकिने अवस्था छैन, तर पनि म संसारलाई देखाउन चाहन्छु कि सही मानसिकता भएमा केही पनि असम्भव छैन।”

सन् २०१० मा ब्रिटिस गोर्खा रेजिमेन्टमा कार्यरत रहँदा अफगानिस्तानमा ‘आईईडी’ विष्फोटमा परेर दुवै खुट्टा गुमाएका हरिले निकै कठिन मानसिक र शारीरिक संघर्ष पार गरेका छन्। उनले सन् २०२३ मा सगरमाथा, २०२४ मा डेनाली र २०२५ मा कार्सटेन्ज पिरामिड आरोहण गरेर इतिहास रचिसकेका छन्।

“यदि आज कसैले मलाई मेरो खुट्टा फिर्ता दिन्छु भन्यो भने पनि म अस्वीकार गर्नेछु। किनभने मेरो जीवनको लक्ष्य अब अरूलाई प्रेरित र सशक्त बनाउनु हो। अफगानिस्तानमा खुट्टा गुमाएपछि धेरै अँध्यारा दिनहरू आए, तर परिवार, साथीहरू र विभिन्न संस्थाहरूको सहयोगले आज म संसारमा सकारात्मक प्रभाव पार्ने अवसर पाइरहेको छु।”

हालसम्म इतिहासमा केवल ५०० जनाले मात्र ‘सेभेन समिट’ पुरा गरेका छन्। यो आरोहण सफल भएमा हरि यस्तो सफलता पाउने विश्वकै पहिलो ‘डबल एबोभ-नी एम्प्युटी’ बन्नेछन्। उनको यो मिसन अपाङ्गता भएका व्यक्तिहरू प्रतिको दृष्टिकोण बदल्नु र सबैलाई आफ्ना सपनाहरू पछ्याउन प्रेरित गर्नु हो।

हरिले आफ्नो यस यात्रामा सहयोग गर्ने मुख्य साझेदार DIGI2AL लगायत AG1, ARC for Nepal, Gurkha Welfare Trust, Ottobock र अन्य सबै सहयोगी संस्थाहरूलाई विशेष धन्यवाद दिएका छन्।

बुढा मगरले यस आरोहणको लागि एक लाख पाउण्ड क्रोफनडिङद्वारा उठाउने लक्ष लिएका छन्। उक्त रकम मध्ये ९० हजार उठिसकेको र १० हजार उठाउन बाँकी रहेको जानकारी गराएका छन्। बुढा मगरले बाँकी रहेको रकम उठाउनको लागि सम्पूर्ण नेपाली दाजुभाई तथा दिदीबहिनिहरुसंग अपिल गरेका छन्। सहयोग गर्न चाहने महानुभाबअह्रुको लागि लिङ्क तल दिईएको छ।

https://www.crowdfunder.co.uk/p/hbm7summits#:~:text=Link-,Copied,-to%20clipboard