कास्की , एस के . फाल्गुन ३
Tamu Dhee UK का उपाध्यक्ष कमल गुरुङ ज्यु नेपाल भ्रमणका क्रममा कास्कीको रमणीय पर्यटकीय गाउँ ल्वाङ पुग्दा स्थानीयवासी तथा विद्यालय परिवारले भव्य स्वागत तथा बिशेष सम्मान गरेका छन्। उहाँ गत वर्ष ल्वाङस्थित Shree Barahi Basic School Lwang लाई आफ्ना स्वर्गीय बुवा–आमाको स्मृतिमा रु ७७,७७७ (सतहत्तर हजार सात सय सतहत्तर) रकम “बाराही अक्षय कोष” स्थापना तथा सुदृढीकरणका लागि सहयोग गर्नुभएको थियो। उक्त सहयोगले विद्यालयको दीर्घकालीन शैक्षिक गतिविधि, छात्रवृत्ति वितरण तथा शैक्षिक सामग्री व्यवस्थापनमा महत्वपूर्ण टेवा पुर्याएको विद्यालय प्रशासनले जनाएको छ।
उहाँ यसपटक क्वोने, घोताने/घोण्डे गुरुङ (तमु) समाज युके परिवारका सदस्यहरूसँगै ल्वाङ आइपुग्नुभएको हो। भ्रमणका क्रममा स्थानीय अभिभावक, शिक्षक तथा विद्यार्थीहरूसँग अन्तरक्रिया कार्यक्रम सम्पन्न भएको थियो। कार्यक्रममा वक्ताहरूले प्रवासमा रहेर पनि मातृभूमिको शिक्षा र सामाजिक विकासमा निरन्तर योगदान पुर्याउँदै आएकोमा कमल गुरुङप्रति कृतज्ञता व्यक्त गरेका थिए।
कमल गुरुङ धम्पुस–झग्रेका निवासी स्व. उदय बहादुर गुरुङ र स्व. कुन्ती देवी गुरुङका कान्छा सुपुत्र हुनुहुन्छ। उहाँका पिता स्व. उदय बहादुर गुरुङले ग्रामीण क्षेत्रका बालबालिकालाई गुणस्तरीय शिक्षा उपलब्ध गराउने दीर्घदृष्टिका साथ धम्पुस–झग्रेमा उदय मा.वि. स्थापना गर्नुभएको थियो। सोही शैक्षिक अभियानको निरन्तरताका रूपमा कमल गुरुङ हाल उक्त विद्यालयका संरक्षकको भूमिकामा सक्रिय रहँदै आउनुभएको छ। पारिवारिक रूपमा शिक्षाप्रति गहिरो प्रतिबद्धता र सामाजिक उत्तरदायित्व वहन गर्ने परम्परालाई उहाँले विदेशमा रहेर पनि निरन्तरता दिनुभएको देखिन्छ।
बेलायतमा सफल व्यवसायीको रूपमा स्थापित कमल गुरुङले आर्थिक समृद्धिलाई केवल व्यक्तिगत उपलब्धि नठानी सामाजिक पूँजीका रूपमा प्रयोग गर्दै आउनुभएको छ। “शिक्षा उज्यालो घाम हो, यसबाट कुनै पनि बालबालिका वञ्चित हुनु हुँदैन” भन्ने मान्यतालाई आत्मसात् गर्दै उहाँ र उहाँको परिवारले विभिन्न शैक्षिक, सामाजिक तथा सामुदायिक कार्यक्रमहरूमा सहयोग पुर्याउँदै आएका छन्। विशेषगरी ग्रामीण भेगका विद्यालयहरूमा अक्षय कोष स्थापना, छात्रवृत्ति वितरण, पूर्वाधार सुधार तथा शैक्षिक सामग्री उपलब्ध गराउने कार्यमा उहाँको सक्रियता उल्लेखनीय रहेको स्थानीयवासी बताउँछन्।
तमु समुदायको सांस्कृतिक पहिचान संरक्षण, सामाजिक एकता सुदृढीकरण तथा मातृभूमिसँगको सम्बन्ध प्रगाढ बनाइराख्न Tamu Dhee UK ले निर्वाह गर्दै आएको भूमिकामा कमल गुरुङको नेतृत्व र सहभागिता महत्वपूर्ण मानिन्छ। प्रवासमा बसोबास गर्ने तमु/गुरुङ समुदायलाई संगठित गर्दै सामाजिक उत्तरदायित्वमुखी कार्यक्रम सञ्चालन गर्नुका साथै नेपालस्थित विभिन्न क्षेत्रमा सहयोग समन्वय गर्ने कार्यमा उहाँ अग्रसर रहनुभएको छ।
ल्वाङ गाउँमा आयोजित सम्मान कार्यक्रममा बोल्दै कमल गुरुङले आफू जन्मेको र हुर्केको समाजप्रति कृतज्ञता व्यक्त गर्दै शिक्षा क्षेत्रमा सहयोग गर्नु आफ्नो नैतिक दायित्व भएको बताउनुभयो। उहाँले आगामी दिनहरूमा पनि विद्यालय र गाउँको समग्र विकासका लागि सक्दो साथ र सहकार्य जारी रहने प्रतिबद्धता जनाउनुभयो।
स्थानीय सरोकारवालाहरूले यस्ता सहयोगले केवल आर्थिक राहत मात्र नभई प्रेरणा, उत्साह र दीर्घकालीन विकासको आधार निर्माण गर्ने बताएका छन्। प्रवासमा रहेर पनि गाउँ, विद्यालय र समुदायसँग भावनात्मक तथा व्यावहारिक सम्बन्ध कायम राख्ने कमल गुरुङजस्ता व्यक्तित्वहरू समाजका लागि उदाहरणीय भएको कार्यक्रममा उल्लेख गरिएको थियो।
