गैरआवासीय नेपालीको पुँजीलाई आर्थिक विकाससँग जोड्न अध्यक्ष चन्द्रप्रसाद ढकालको आग्रह
काठमाडौँ । नेपाल उद्योग वाणिज्य महासङ्घका अध्यक्ष चन्द्रप्रसाद ढकालले गैरआवासीय नेपालीको पुँजी, सीप र अनुभवलाई नेपालको आर्थिक विकास र समृद्धिसँग जोड्न आग्रह गरेका छन् ।
शुक्रबार गैरआवासीय नेपाली सङ्घ (एनआरएनए)को नवनिर्वाचित कार्यसमितिलाई महासङ्घ सचिवालय, टेकुमा स्वागत गर्दै अध्यक्ष ढकालले नेपालमा लगानीका पर्याप्त सम्भावना रहेको उल्लेख गर्दै गैरआवासीय नेपालीहरूको पुँजी, सीप र अनुभवलाई नेपालको विकासमा लगाउनुपर्ने बताए ।
उनले महासङ्घको पहलमा धेरै नीतिगत सुधार भएकाले अब लगानीको लागि पनि सहज वातावरण बन्दै गएको धारणा राखे । “महासङ्घले नीतिगत तथा प्रक्रियागत जटिलता न्यूनीकरण गर्ने, वैदेशिक लगानी भित्र्याउन अनुकूल वातावरण निर्माण गर्ने तथा अन्य प्रक्रियागत सरलीकरणका विषयमा नेपाल सरकारसँग धेरै ठूलो लबिङ गरेर थुप्रै नीतिगत सुधार गरेका छौँ । हामीले राम्रो सहकार्य गर्न सक्यौँ नेपाल र नेपालीका लागि धरै गर्न सक्छौँ”, उनले भने ।
सो अवसरमा एनआरएनएका अध्यक्ष डा हेमराज शर्माले गैरआवासीय नेपालीहरू पनि नेपालको विकासमा साझेदार बन्न चाहेको धारणा राखे ।
तस्बिर : रोजिना प्रधान राई
