लन्डन ५ नोभेम्बर २०२५ । बेलायतका लागि नेपाली राजदूत चन्द्रकुमार घिमिरे स्वदेश फर्किएका छन् ।
नेपाल सरकार परराष्ट्र मन्त्रालयले फिर्ता बोलाइएका ११ देशका राजदूतहरूलाई तीन दिनभित्र मन्त्रालयमा उपस्थित हुन दिएको पछिल्लो निर्देशनसँगै घिमिरे मंगलबार नेपाल प्रस्थान गरेका हुन् ।
घिमिरेले सन् २०२५ को जनवरी १७ मा लन्डनस्थित नेपाली दूतावासमा २३औँ नेपाली राजदूतका रूपमा आफ्नो पदभार ग्रहण गरेका थिए । करिब नौ महिनाको कार्यकालपछि उनी धर्मपत्नी सरिता न्यौपाने घिमिरे र सहयोगीसहित नेपाल प्रस्थान गरेका छन् ।
परराष्ट्र मन्त्रालयले सोमबार जारी गरेको पत्रमा कार्तिक १७ गतेको निर्णयअनुसार प्रधानमन्त्री तथा परराष्ट्रमन्त्रीस्तरीय निर्देशनका आधारमा राजदूतहरूलाई अर्को व्यवस्था नभएसम्म मन्त्रालयमा रही कामकाज गर्न नेपाल बोलाइएको उल्लेख छ । नेपाल फर्किने तयारी भइरहेका बेला सर्वोच्च अदालतले ११ देशका राजदूतहरूलाई फिर्ता बोलाउने निर्णय कार्यान्वयन नगर्न अन्तरिम आदेश जारी गरे पनि त्यसको भोलिपल्टै सरकारले पुनः राजदूतहरूलाई तीन दिनभित्र मन्त्रालयमा हाजिर हुन निर्देशन दिएको थियो ।
मन्त्रालयले चीन, जर्मनी, मलेसिया, इजरायल, कतार, रुस, साउदी अरब, स्पेन, बेलायत, संयुक्त राज्य अमेरिका र जापानमा कार्यरत ११ देशका राजदूतहरूलाई राजनीतिक नियुक्ति भन्दै फिर्ता बोलाएको हो ।
राजदूत घिमिरे फर्किएपछि दूतावासका उपनियोग प्रमुख विपिन दुवाडीले कार्यवाहक राजदूतको जिम्मेवारी सम्हाले छन् । दुवाडीले यसअघि पनि सन् २०२४ सेप्टेम्बरदेखि २०२५ जनवरीसम्म कार्यवाहक राजदूतको भूमिका निर्वाह गरिसकेका छन् ।
