लन्डन । नेपाली दूतावास लन्डनबाट राहदानी लिन केही समय कुर्नुपर्ने भएको छ ।
राहदानी विभागले राहदानी खरिदका लागि नयाँ आपूर्तिकर्तासँग सम्झौता गरी नयाँ प्रणालीमार्फत राहदानी जारी गर्न राहदानी प्रणाली, राहदानी पुस्तिका लगायतको आवश्यक तयारी गरिसकेकाले राहदानी सेवा केही समय प्रभावित हुने भएको हो ।
जिल्ला/इलाका प्रशासन कार्यालय तथा विदेशस्थित नेपाली नियोगबाट प्रदान गरिने राहदानी सेवा तीनहप्तासम्म बन्द हुन सक्ने राहदानी विभागले सूचनामार्फत जानकारी गराएको छ ।
नयाँ प्रणाली कार्यान्वयन भएपश्चात् प्रणाली स्थिरीकरण हुन एकदेखि ३ महिनासम्म लाग्ने भएकाले उक्त अन्तरिम अवधिमा जिल्ला/इलाका प्रशासन कार्यालय तथा विदेशस्थित नेपाली नियोगबाट आवेदन दिँदा राहदानी तयार भई जारी हुन हालको भन्दा बढी समय लाग्न सक्ने राहदानी विभागले जनाएको छ ।
