लन्डन ७ सेप्टेम्बर २०२४ । बेलायतमा नेपालबाट आएका दुई दर्जन कलाकारको प्रस्तुतिसहित तीज धमाका-२०२४ सम्पन्न भएको छ ।
भक्त दर्जी नेतृत्वको सिर्जनशील नेपाली समाज युके, लक्ष्मी राई सञ्चालक रहेको न्यू लक्ष्मी ज्वेलर्स, पुरन गिरी सञ्चालक रहेको एम्पायर बैंक्वेटिङ एन्ड हल र एनएफडीएसएएन कमिटी युकेसहित ४ वटा संस्थाको आयोजनामा शुक्रबार ६ सेप्टेम्बरमा तीज धमाका भएको हो । कार्यक्रममा नेपालबाट बेलायत आएका र यहाँ रहेका चर्चित लोक तथा दोहोरी गायिका, मोडल तथा डान्सरहरुले जोडदार प्रस्तुति दिए । उनीहरुले तीजसम्बन्धी विषयवस्तुमा एकल र दोहोरी गाएका थिए । उपस्थित दर्शकहरु निकै रमाइलो मानेर नाचगान गरेका थिए ।
अल्डसटस्थित एम्पायर हलमा आयोजित कार्यक्रममा मनमाया वाइबा, सबिना गुरुङ, टीका सानु, उषा गुरुङ, सपना गाहामगर, कला लम्साल, रेजिना परियार, गायकहरु रविन लामिछाने, राजु ढकाल, सुमन परियारलगायत उपस्थित थिए । हिन्दु नेपालीहरुले मनाउने तीज पर्व यस वर्ष भदौ २१ अर्थात् सेप्टेम्बर ६ तारिखमा बेलायत, नेपालसहित विश्वभर मनाइएको छ ।
