महेन्द्र आले, यूके
सम्पर्क नम्बर0044(0)7445538499
तनहुँ जिल्ला भिमाद नगरपालिका वडा नम्बर ५ स्थित मिछुर्लुङ मगरहरुको बस्ती भएको गाउँ हो । यो गाउँ जान काठमाडौंबाट पृथ्वी राजमार्ग हुँदै करिब १७५ किमि पार गरेपछि खैरेनीटारमा ओर्लनु पर्छ । खैरेनीटारबाट करिब ७ किमि दक्षिण लागेपछि भिमाद बजारमा पुगिन्छ । भिमाद बजारबाट करिब ५ किमि उकालो पार गरेपछि डाँडामा सुन्दर गाउँ मिछुर्लुङमा पुगिन्छ ।
यस्तै पोखराबाट करिब एक घन्टामा मिछुर्लुङ गाउँमा पुग्न सकिन्छ । यो गाउँमा घुम्न आउने पर्यटकहरुलाई खान र बस्ने व्यवस्था मिछुर्लुङ सामुदायिक होमस्टेले गर्दछ । गाउँलेहरुले आफैंले उत्पादन गरेको अर्गानिक खाने कुराहरु पाहुनाहरुलाई खुवाइन्छ । साँझ पाहुनाहरुलाई मिछुर्लुङ सांस्कृतिक समूहले नाचगान गराएर भरपुर मनोरन्जन दिलाउँछ । यो गाउँमा आएपछि मगरहरुको संस्कृति, संस्कार र रहनसहन हेर्न पाइन्छ । रिसिङ, घिरिङजस्ता ऐतिहासिक गाउँहरु यो गाउँबाट देख्न सकिन्छ । यो गाउँबाट देबचुली बडाचुलीजस्ता अग्ला पहाडहरु पनि देख्न सकिन्छ । यो गाउँमा आँटीथाप झरना र ढुङढुङगे पहराको दृश्य अवलोकन गर्न पाइन्छ। यो गाउँबाट सेताम्मे हिमशृंखलाहरु देख्न पाइन्छ ।
पर्यटकहरुलाई आकर्षित गर्न र सामुदायिक होमस्टेलाई प्रवर्द्धन गर्ने उद्देश्यले हाल प्रवासमा रहेका मिछुर्लुङहरुले आफू जन्मेको हुर्केको ठाउँमा भ्यूटावर निर्माण गर्ने अभियानमा लागेका छन् र यसका लागि आर्थिक सहयोग संकलन अभियानमा जुटेका छन् । युरोपमा महेन्द्र आलेलाई, अमेरिकामा सुरेन्द्र आलेलाई, अस्ट्रेलियामा बिमल थापालाई, जापानमा कृष्ण लालचनलाई र अरब मुलुकमा मोहन थापालाई आर्थिक संकलन गर्न जिम्मेवारी दिएको छ । उहाँहरुले आफ्ना साथीभाइ ईष्टमित्रहरुबाट आजको मितिसम्ममा रु २२ लाख संकलन गर्न सफल हुनु भएको छ र छिट्टै पच्चीस लाख पुग्ने अनुमान गरिएको छ । यसरी विदेशमा बस्ने प्रवासीहरुको पहलमा छिट्टै नै मिछुर्लुङ गाउँमा भ्यू टावर निर्माण हुने भएको छ ।
