रोल्पा । सुनछहरी गाउँपालिका–२ फलबाङमा पहिरोले घर पुरिँदा तीन जनाको मृत्यु भएको छ ।
शुक्रबार बिहान ८:१० बजे स्थानीय वीरु घर्ती मगरको घर पहिरोले पुरिँदा घरमा रहेका तीन जना बेपत्ता भएका थिए । घटनापछि स्थानीयवासी तथा सुरक्षाकर्मीले खोजी तथा उद्धार कार्य अघि बढाएका थिए ।
खोजी गर्ने क्रममा बिहान ११:३० बजे तीनै जनाको शव फेला परेको हो । मृत्यु हुनेमा सुनछहरी गाउँपालिका–२ फलबाङका ७७ वर्षीय वीरु घर्ती मगर, ६८ वर्षीया सनी घर्ती मगर र ७० वर्षीया लली घर्ती मगर रहेका छन् ।
पहिरोका कारण घर पुरिँदा उनीहरूको मृत्यु भएको नेपाल प्रहरीले जनाएको छ ।
