काठमाडौं । परराष्ट्र सचिव अमृतबहादुर राई र बेलायतकी इन्डो–प्यासिफिक मन्त्री बारोनेस विन्टरटनबीच भेटवार्ता भएको छ ।
परराष्ट्र मन्त्रालयमा बुधबार भएको भेटमा मन्त्री विन्टरटनले भोटेकोशी नदीमा आएको विनाशकारी बाढीबाट भएको ठूलो जनधनको क्षतिप्रति नेपाल सरकार र नेपाली जनताप्रति गहिरो समवेदना व्यक्त गरिन् । भेटमा बाढीपछि जारी खोजी, उद्धार तथा पुनःस्थापनाका प्रयासबारे छलफल भएको परराष्ट्र मन्त्रालयले जनाएको छ ।
सचिव राईले राहत तथा विपद्पछिको पुनःस्थापनाका लागि बेलायत सरकारले व्यक्त गरेको ऐक्यबद्धता र सहयोगको प्रस्तावप्रति धन्यवाद दिए ।
मन्त्री विन्टरटनले मन्त्रालयमा राखिएको शोक पुस्तिकामा समेत हस्ताक्षर गरेकी छन् । मन्त्री विन्टरटन दुई दिने नेपाल भ्रमणका लागि बुधबार काठमाडौं आइपुगेकी हुन् ।
