काठमाडौं । रसुवाका जलविद्युत् आयोजनाका सुरुङमा खोजी गर्ने क्रममा बुधबार एकै दिन १० जनाको शव फेला परेको छ ।
२१६ मेगावाट क्षमताको माथिल्लो त्रिशूली–१ जलविद्युत् आयोजनाको अडिट–३ टनेलबाट पाँच जनाको शव फेला परेको हो । नेपाली सेना तथा आयोजनाबाट खटिएको संयुक्त उद्धार टोलीले सुरुङभित्र खोजी गर्ने क्रममा ती शव फेला पारेको सहायक प्रमुख जिल्ला अधिकारी द्रुवप्रसाद अधिकारीले जानकारी दिए ।
त्यस्तै, चिलिमे जलविद्युत् आयोजनाको पावर हाउस नजिक ट्रलीले ब्रेकथ्रु गरेपछि सुरुङभित्रबाट थप पाँच जनाको शव फेला परेको नेपाली सेनाले जनाएको छ ।
फेला परेका शवको पहिचान खुलाउने प्रयास भइरहेको छ । घटनाको विस्तृत विवरण आउन बाँकी रहेको सेनाले जनाएको छ । सुरुङभित्र बेपत्ता भएकाहरूको खोजी तथा उद्धार कार्य जारी छ ।
१० भदौमा आएको भोटेकोशी बाढीका कारण रसुवासहितका जिल्लामा ठूलो जनधनको क्षति भएको थियो । त्यसयता सुरक्षाकर्मीले प्रभावित क्षेत्रमा खोज तथा उद्धार जारी राखेका छन् ।
