साभार- टुडेप्रेस डटकम
२५ सेप्टेम्बर २०२६ बेलायत । बेलायतमा भूतपूर्व तथा सेवारत गोर्खा सैनिकहरूका लागि घरभाडाको व्यवस्था गर्ने व्यवसाय सञ्चालन गर्दै आएको ‘निक धिमाल रियल इस्टेट’ विरुद्ध ठगीको आरोप बाहिर आएको छ।
मूल रूपमा नेपालको झापा, बिर्तामोडका निखिल ढिमालमाथि आफ्नो नाममा स्थापित व्यवसायमार्फत सयौं मानिसलाई ठगी गरेको आरोप लागेको छ। धिमाल सन् २०१८ को भर्नाबाट ब्रिटिश सेनामा प्रवेश गरेका थिए। उनि १ रोयल गोर्खा राइफल्समा पाँच वर्ष सेवा गरेपछि बाहिरिएका थिए।
पीडितहरूका अनुसार धिमालले उपयुक्त भाडावाल खोज्ने बाचा गर्दै उनीहरूको घर भाडामा लगाउने जिम्मेवारी लिएका थिए। उनीहरूले उनको व्यवसायमार्फत भाडामा लगाइएका नेपालीहरूका १० वटा घरमा गाँजा खेती गरिएको भेटिएको दाबी गर्दै उनी त्यस्ता गतिविधिहरूमा संलग्न रहेको आरोप लगाएका छन्।
उनीहरूले यो पनि आरोप लगाएका छन् कि धिमालले घरधनीहरूलाई बाँकी भाडा कभर गर्ने बीमा गर्न प्रोत्साहन गरे, जानाजानी भाडा तिर्न नसक्ने भाडावालहरू राखे, र त्यसपछि घरधनीहरूलाई रकम नदिएर बीमा कम्पनीबाट पैसा असुल गरे।
धिमालमाथि विभिन्न व्यवस्थाहरू मार्फत ३०० भन्दा बढी मानिसलाई ठगी गरेको आरोप छ। पीडितहरूले कथित ठगी गतिविधिहरूको थप विवरण छिट्टै सार्वजनिक गर्ने बताएका छन्।
टुडेप्रेस डटकमले प्रतिक्रियाका लागि धिमाललाई सम्पर्क गर्ने प्रयास गरे पनि उनीसँग सम्पर्क हुन सकेको छैन भनेर समाचारमा लेखिएको छ ।
कम्पनी हाउसका कागजातहरूले धिमालले अन्य कम्पनीहरू पनि सञ्चालन गर्ने गरेको देखाएको बताइएको छ। सुभम झा र धिमालका दाजु प्रनिक ढिमालले उनको व्यावसायिक गतिविधिमा सहयोग गरेको बताइएको छ।
उक्त व्यवसायको मुख्य कार्यालय कोभेन्ट्रीमा रहेको र बेलायतका अन्य भागहरूमा पनि यसको कार्यसञ्चालन रहेको बुझिएको छ।
