मनसुधन थापामगर
बेलायत चैत ७ । राष्ट्रिय लोक तथा दोहोरी गीत प्रतिष्ठान नेपाल यूके शाखाले दोस्रो भर्चुअल लाईभ दोहोरी गर्ने भएको छ ।
आउँदै गरेको यही अप्रिल ४ तारिखका दिन प्रतिष्ठानले चर्चित लोक तथा दोहोरी कलाकारहरुलाई नेपालबाट निमन्त्रण गरेर जुममार्फत भर्चुअल लाईभ दोहोरी कार्यक्रम गर्ने भएको हो । कार्यक्रममा चर्चित लोक तथा दोहोरी गायक बद्री पंगेनी, राजु परियार, चन्द्र शर्मा, सुमन थापा र डिला बि.क.को प्रस्तुति रहनेछ भने केही स्थानीय कलाकारहरुको पनि प्रस्तुति रहने संस्थाका अध्यक्ष टंक शेरचनले जानकारी दिएका छन् ।
कार्यक्रममा प्रतिष्ठान यूरोप शाखाको अध्यक्षलगायत स्थानीय विभिन्न संघसंस्थाका प्रतिनिधिहरुलाई समेत निमन्त्रणा गरिने जनाइएको छ । कार्यक्रमलाई व्यवस्थित बनाउनका लागि काठमाडौंमा अलाप स्टुडियो व्यवस्था गरिएको छ भने नेपालबाट सहभागी हुने सम्पूर्ण कलाकार अलाप स्टुडियोदेखि आफ्नो लाईभ प्रस्तुति दिनेछन् ।
बेलायतको विभिन्न ठाउँमा रहने र लोक तथा दोहोरी गीतलाई माया गर्ने व्यक्तित्वहरुले यस कार्यक्रममा सहभागी हुन इच्छुक छन् भने प्रतिष्ठानका प्रथम उपाध्यक्ष लक्ष्मण राना, सचिव रत्न शाही लगायत कार्यसमितिका साथीहरूको मोबाइल नम्बर पोस्टरमा उपलब्ध गराइएको संस्थाका अध्यक्ष शेरचनले जानकारी दिए ।
स्थानीय समय अनुसार बिहान ११ बजेदेखि सुरु हुने यो कार्यक्रमको उद्घाटन राष्ट्रिय लोक तथा दोहोरी गीत प्रतिष्ठान नेपालका केन्द्रीय अध्यक्ष रमेश बिजीले गर्नेछन् भने लन्डन नेपाल न्यूजबाट प्रतक्ष्य प्रसारण हुने आयोजकले जनाएको छ ।
