लण्डन SK। बेलायतमा सक्रिय सामाजिक संस्था तमुधीँ यूकेका चार प्रतिनिधि आगामी सेप्टेम्बरमा आयोजना हुने अन्तर्राष्ट्रिय परोपकारी खेल ट्रेलवाकर २०२६ मा सहभागी हुने भएका छन्। १०० किलोमिटर लामो कठिन दूरी पार गर्ने यो चुनौतीपूर्ण प्रतियोगितामा उनीहरूको सहभागिता खेलभन्दा पनि सामाजिक सेवा र सामुदायिक योगदानसँग जोडिएको छ।
यसपटक प्रतियोगितामा तमुधीँ यूकेका तर्फबाट टोली नेता शान्तकुमार गुरुङ, उपाध्यक्ष कमल कोन्मे गुरुङ, सल्लाहकार तर्कजङ्ग (टीजे) गुरुङ र अनुभवी धावक तथा गोर्खा किचनका प्रबन्ध निर्देशक भीम गुरुङ सहभागी हुँदैछन्। चार सदस्यीय यो टोलीले आपसी समन्वय, सहनशीलता र टोलीगत भावना प्रदर्शन गर्दै पूरा दूरी तय गर्ने लक्ष्य राखेको छ।
टोलीका अनुसार उनीहरूको मुख्य उद्देश्य गोर्खा वेलफेयर ट्रस्टका लागि आर्थिक सहयोग जुटाउनु हो। यस अभियानमार्फत करिब १ हजार २०० पाउण्ड चन्दा संकलन गर्ने लक्ष्य राखिएको छ। संकलित रकम गोर्खा समुदायका वृद्ध, पूर्वसैनिक तथा उनीहरूका परिवारलाई सहयोग पुर्याउने सामाजिक कार्यक्रमहरूमा प्रयोग गरिनेछ।
टोली नेता शान्तकुमार गुरुङले ट्रेलवाकरलाई केवल खेल प्रतियोगिता नभई सामाजिक उत्तरदायित्व निभाउने अवसरका रूपमा लिएको बताए। उनका अनुसार यो अभियानले नेपाली समुदायको एकता र परोपकारी संस्कृतिलाई अन्तर्राष्ट्रिय स्तरमा प्रस्तुत गर्ने अवसर प्रदान गर्नेछ।
“हामी चार जना केवल दौडन होइन, समुदायका लागि केही योगदान गर्न मैदानमा उत्रिँदैछौँ,” गुरुङले भने। उनले ट्रेलवाकरले सहनशीलता, अनुशासन र सामूहिक प्रयासलाई एकसाथ जोड्ने भएकाले यसमा सहभागिता विशेष अर्थपूर्ण हुने बताए।
टोलीका सदस्यहरू लामो समयदेखि बेलायतमा नेपाली समुदायसँग सम्बन्धित सामाजिक, सांस्कृतिक तथा परोपकारी गतिविधिमा सक्रिय रहँदै आएका छन्। उनीहरूले विभिन्न कार्यक्रममार्फत गोर्खा समुदाय, वृद्ध सदस्य तथा युवाहरूलाई जोड्ने कार्य गर्दै आएका छन्। यसपटकको ट्रेलवाकर सहभागिताले उक्त योगदानलाई अझ सशक्त बनाउने उनीहरूको विश्वास छ।
भीम गुरुङ अन्तर्राष्ट्रिय स्तरका अनुभवी धावक हुन् भने कमल कोन्मे गुरुङ र तर्कजङ्ग (टीजे) गुरुङ सामाजिक तथा संस्थागत नेतृत्वमा सक्रिय छन्। यी सबै सदस्यहरूको संयुक्त सहभागिताले टोलीलाई थप मजबुत बनाएको छ।
टोलीले प्रतियोगिताका क्रममा आवश्यक पर्ने जुत्ता, पोसाक, मेडिकल सामग्री तथा प्रशिक्षण व्यवस्थापनको तयारी पनि तीव्र बनाएको छ। नियमित अभ्यासमार्फत उनीहरू शारीरिक तथा मानसिक रूपमा प्रतिस्पर्धाका लागि तयार भइरहेका छन्।
तमुधीँ यूकेले ट्रेलवाकरलाई नेपाली समुदायको सकारात्मक पहिचान विस्तार गर्ने अवसरका रूपमा लिएको छ। यस अभियानले नेपाली र गोर्खा समुदायको योगदानलाई अन्तर्राष्ट्रिय स्तरमा अझ स्पष्ट रूपमा उजागर गर्ने अपेक्षा गरिएको छ।
ट्रेलवाकरको पृष्ठभूमि
ट्रेलवाकरको सुरुआत सन् १९८१ मा हङकङमा भएको मानिन्छ। क्वीन्स गोर्खा सिग्नल्स (QGS) ले म्याक्लेहोज ट्रेल क्षेत्रमा सैनिकहरूको सहनशीलता र टोलीगत क्षमताको परीक्षणका लागि पहिलो अभ्यास सुरु गरेको थियो। पछि यो अभ्यास विश्वव्यापी परोपकारी खेलका रूपमा विकास हुँदै लामो दूरीको दौडमार्फत सामाजिक सहयोग संकलन गर्ने प्रतिष्ठित कार्यक्रम बनेको हो।
