सत्तारूढ राष्ट्रिय स्वतन्त्र पार्टीका नेता तथा कलाकार हिमेश पन्तले दिएको उजुरीका आधारमा साइबर ब्युरोबाट प्रहरी टोली ललितपुरको नख्खुस्थित श्रेष्ठ निवास पुगेपछि उनी आफ्नै साइबर ब्यूरो गएका हुन् ।

यसैबीच पत्रकार श्रेष्ठलाई पक्राउ गरेको घटनाप्रति नेपाल पत्रकार महासङ्घले गम्भीर आपत्ति जनाएको छ। महासङ्घले श्रेष्ठलाई बिनासर्त तत्काल रिहा गर्न सरकारसँग माग गरेको छ।

सत्तारूढ राष्ट्रिय स्वतन्त्र पार्टीका नेता तथा कलाकार हिमेश पन्तले दिएको उजुरीका आधारमा श्रेष्ठ पक्राउ परेका हुन् । पन्तले धादिङमा छिमेकीको १० रोपनी जग्गा हडपेको विषयमा जनआस्था साप्ताहिकमा समाचार प्रकाशित भएको थियो। सोही समाचारसम्बन्धी उजुरीका आधारमा वरिष्ठ प्रहरी उपरीक्षक (एसएसपी) सन्तोष खड्कासहितको प्रहरी टोलीले आज श्रेष्ठलाई ललितपुरको नख्खुस्थित निवासबाट पक्राउ गरेको हो।

समाचारप्रति चित्त नबुझे स्थापित र प्रचलित विधिअनुसार समाधान खोज्नुपर्नेमा साइबर ब्युरोमार्फत पक्राउ गर्नु प्रेस स्वतन्त्रता र संविधानको मर्मविपरीत रहेको महासङ्घले जनाएको छ। यस्तो घटनाले लोकतान्त्रिक मूल्य–मान्यता र स्वतन्त्र प्रेसको विश्वव्यापी मान्यताको समेत उपहास गरेको महासङ्घको ठहर छ।

प्रेस काउन्सिल नेपालको क्षेत्राधिकारसमेत मिचेर राज्यसत्ताको आडमा स्वेच्छाचारी व्यवहार गरिएको भन्दै महासङ्घले घटनाको कडा भर्त्सना गरेको छ।

महासङ्घले प्रेसविरोधी व्यवहार सच्याउन र पत्रकार श्रेष्ठलाई तत्काल बिनासर्त रिहा गर्न सरकारको ध्यानाकर्षण गराएको छ। साथै, समाचारका विषयमा असमझदारी उत्पन्न भए सम्बन्धित निकायमार्फत समाधान खोज्न सम्बद्ध पक्षलाई आग्रह गर्दै आफ्नो क्षेत्राधिकारभित्रका विषयमा प्रभावकारी भूमिका निर्वाह गर्न प्रेस काउन्सिल नेपाललाई अनुरोध गरेको छ।