काठमाडौं । मेक्सिकोले आप्रवासीलाई सीमा क्षेत्रमा रोक्न हरसम्भव कदम चाल्न सहमति जनाएको छ ।
अमेरिकासँग तीनदिने वार्ताको अन्त्यमा यो सहमति सम्भव भएको मेक्सिकोका विदेशमन्त्री मार्सेलो एड्राडले बताए ।
अमेरिकी विदेश मन्त्रालयले जारी गरेको संयुक्त विज्ञप्तिमा मेक्सिकोले अवैध आप्रवासी र मानव तस्करी रोक्न सम्भव भएसम्मका उपाय अपनाउन सहमति जनाएको उल्लेख गरेको छ ।
अमेरिकाले आप्रवासीहरूको दाबीबारे समीक्षा भइरहँदा शरणार्थीको मान्यता खोज्नेहरूलाई मेक्सिको पठाउने कार्यक्रम विस्तार गर्न सहमति जनाएको छ । त्यसको बदलामा अमेरिकाले न्यायिक प्रक्रिया तीव्रगतिमा अघि बढाउनेछ ।
दुई मुलुकबीचको सहमतिअनुसार मेक्सिकोले सोमबारबाट आफ्ना सबै सीमा क्षेत्रमा ‘नेसनल गार्ड’ खटाउनेछ भने ग्वाटेमालासँगको दक्षिणी सीमामा थप ६ हजार अतिरिक्त सेना परिचालन गर्नेछ ।
यस्तै, मानव तस्करीको सन्जाल निस्तेज पार्न निर्णायक कदम चाल्नेछ ।
