एटा संवाददाता ।
लण्डन । तमु धिं युकेद्वारा एनआरएनए युकेको कोभिड–१९ कोषलाई एकहजार ४०१ पाउण्ड आर्थिक सहयोग गरेको छ । शनिबार ६ जुनका दिन तमु धिं भवन मिचेटमा एनआरएनए युकेकी अध्यक्ष पुनम गुरुङलाई तमु धिं युकेका अध्यक्ष नन्दजंग गुरुङले उक्त रकमको चेक हस्तान्तरण गरेको हो । नेपाली समुदाय बेलातयमा रहेका नेपाली संघसंस्थाहरु मध्येको एक सक्रिय संस्था तमु धिं युकेले एनआरएनए यूकेद्वारा संचालित कोभिड–१९ राहत कोषका लागि उक्त आर्थिक सहयोग गरेको हो ।
उक्त चेक हस्तान्तरण कार्यक्रममा एनआरएनए युकेकी अध्यक्ष पुनम गुरुङले तमु धिं युकेले गर्दै आएको सहयोगको प्रसंशा गर्दै हार्दिक धन्यवाद दिईन् । त्यस्तै, तमु धिं युकेका अध्यक्ष नन्दजंग गुरुङले उक्त सहयोग कोरोनाबाट प्रभावितहरुमा पुगोस् भन्दै यस बिषयम परिस्थितिमा एनआरएनए युकेले गर्दै आएको सहयोगको खेलेर प्रसंशा गरे । सो अवसरमा तमु धिं युकेका संस्थापक अध्यक्ष मीनप्रसाद गुरुङ, पूर्व अध्यक्ष सुर्जे (रामचन्द्र) गुरुङ, उपाध्यक्ष हितकाजी गुरुङ, उपाध्यक्ष जुमकाजी गुरुङ, महासचिव तुलाराम गुरुङ, कोषाध्यक्ष कुमार गुरुङ लगायतको उपस्थिति रहेको थियो । त्यस्तै, एनआरएनए यूकेका उपाध्यक्ष सुनिलबाबु खड्का, कोषाध्यक्ष तेजेन्द्र रोका र कार्यसमिति सदस्यद्धय हेम गुरुङ र धनबहादुर सार्कीको उपस्थिति रहेको थियो ।
एनआरएनए यूकेको कोभिड–१९ राहत कोषमा हालसम्म १९ हजार २ सय ६४ पाउण्ड जम्मा भएको र जस अन्तर्गत ९ हजार १ सय ४० पाउण्ड ‘कोभिड–१९’ अन्तर्गतको बिभिन्न शिर्षकमा खर्च भई १० हजार १ सय २४ पाउण्ड खातामा मौज्दात रहेको एनआरएनए युकेले गत ४ जुनका दिन एक प्रेस वक्तव्यमार्फत जानकारी गराएका थिए । तमु धिं युकेका अध्यक्षतामा सम्पन्न उक्त चेक हस्तान्तरण अनौपचारिक कार्यक्रमलाई महासचिव तुलाराम गुरुङले संचालन गरेका थिए ।
स्मरण रहोस् तमु धिं युकेले नेपालमा महाभूकम्पको अवस्थामा एनआरएनएमार्फत एक करोड ११ लाख ११ हजार रुपैयाँ र नेपाली दूतावास लण्डनमार्फत १० लाख आर्थिक सहयोग गरेको थियो ।
नेपाली समुदाय बेलायतमा अत्यन्त लोकप्रिय खेल गोर्खा कप, नेपाली मेला, ल्होछार, रेस फर लाईफ, लाईफ मेम्बर डिनर नाईट लगायत थुप्रै कार्यक्रमको आयोजना गर्दै आएको छ । तर, यसपटक कोभिडका कारण १८ औं गोर्खा कप फुटबल प्रतियोगिता रद्ध भएको छ भने नेपाली मेला समेत सामाजिक दुरीका कारण हुन नसक्ने संभावना बढ्दै आएका तमु धिं युकेले जनाएको छ ।
तस्बीर सौजन्यः हेम गुरुङ
