सबिन्द्र कुमार गुरुङ लन्डन पुस २० ।
कोल्मा बहाकोट समाज यूकेको अध्यक्षमा कृष्ण गुरुङ निर्विरोध निर्वाचित भएका छन् ।
कोभिड–१९ का कारण भर्चुअलमार्फत समाजको यूकेमा सम्पन्न साधारणसभाले गुरुङलाई अध्यक्षमा सर्वसम्मत रुपमा चयन गरेको हो । त्यसैगरी समाजको वरिष्ठ उपाध्यक्षमा चन्द्रबहादुर गुरुङ, उपाध्यक्षमा सूर्य गुरुङ, महासचिवमा मनोज गुरुङ र कोषाध्यक्षमा रामचन्द्र गुरुङ निर्वाचित भएका छन् । ३ वर्ष कार्यकाल रहने समाजको कार्यसमितिको १० सदस्यहरु यथाशीघ्र मनोनयन गरिने भएको निर्वाचित अध्यक्ष गुरुङले बताएका छन् ।
निर्वाचित अध्यक्ष गुरुङ सहारा यूके फुटबल क्लबका चेयरमेन हुन् भने वरिष्ठ उपाध्यक्ष चन्द्रबहादुर गुरुङ सहारा क्लव यूकेको सल्लाहाकार एवम् चेरिटन नेपाली समाजको अध्यक्ष समेत हुन् ।
बेलायतमा स्थापना भएको कोल्मा बहाकोट समाज खेलकुद, शिक्षा,तथा समाजसेवाको क्षेत्रमा अग्रणी भूमिका निर्वाह गरेको छ । भर्चुअल सभामा सहारा यूकेका संस्थापक अध्यक्ष नविन गुरुङ, सहारा यूकेका पूर्वअध्यक्ष दिलीप गुरुङ ‘एमबिई’ लगायत १ सय भन्दा बढीको उपस्थिति रहेको नवनिर्वाचित अध्यक्ष गुरुङले बताए ।
कोल्मा बहाकोट स्याङ्जा जिल्ला पुतलीवजार वडा नं ९ लगायतका केही वडाहरुलाई समेट्छ । कोल्मालाई विश्वमा परिचय गराउन तथा स्थानीय युवाहरुलाई स्वरोजगार बनाउँदै खेलकुदमा सहभागी गराउने लगायतका विभिन्न कार्यक्रमहरुमा समेत समाजले भूमिका खेलिरहेको छ ।
त्यस्तै कोल्माको शिक्षा लगाएत सामाजिक क्षेत्रको विकासका लागि स्थानिय नागरिकहरुको सहभागितामा विभिन्न कार्यक्रमहरु समेत तय गरेको छ ।
