पोखरा वैशाख १६ । मनाङ प्रदेश ‘ख’ स्वतन्त्र सांसद राजीव गुरुङ (दीपक मनाङे) ले गण्डकी प्रदेशको युवा तथा खेलकुदमन्त्री बनेका छन् ।
मुख्यमन्त्री पृथ्वीसुब्बा गुरुङले सामाजिक विकास मन्त्रालय टुक्र्याएर मनाङेलाई बिहीबार मन्त्रीमा नियुक्त गरेका हुन् । उनलाई प्रदेश प्रमुख अमिक शेरचनले प्रदेश नीति तथा योजना आयोगको हलमा शपथ खुवाएका हुन् ।
सरकार विरुद्ध अविश्वासको प्रस्ताव आएका बेला मुख्यमन्त्री गुरुङले मन्त्रिपरिषद् विस्तार गरेर मनाङेलाई मन्त्री पदमा नियुक्त गरेका हुन् । त्यसैमाथि डन पृष्ठभूमिका गुरुङलाई मन्त्री बनाएपछि मुख्यमन्त्री गुरुङ र एमालेको चौतर्फी आलोचना भइरहेको छ ।
यसअघि माओवादी केन्द्रका मन्त्रीले राजीनामा दिएपछि आन्तरिक मामिला तथा कानुन मन्त्रालय र भूमि व्यवस्था, कृषि तथा सहकारी मन्त्रालय भने खाली नै छन् । कानुन मन्त्रालयको जिम्मा भौतिक पूर्वाधार विकास मन्त्री रामशरण बस्नेत र कृषि मन्त्रालय मुख्यमन्त्री गुरुङले आफैंले राखेका छन् ।
बुधबार मुख्यमन्त्रीविरुद्धको अविश्वासको प्रस्तावमा तय भएको मतदानका बेला भने उनी उपस्थित भएका थिएनन् ।
