लण्डन ३१ मे २०२३ ।
भूतपूर्व गोर्खाहरुको मुद्धामा बेलायत सरकारसंगको अर्को वार्ता आगामी महिना हुने भएको छ ।
जुन १५ तारिख बिहान ११ बजे लन्डनस्थित बेलायती रक्षा मन्त्रालयमा वार्ता तय भएको छ । भूतपूर्व गोर्खाहरुको समान पेन्सनसहितका विभिन्न मागहरुमा बेलायत तथा नेपाल सरकार र गोर्खाहरुसमेतको सहभागितामा चरणबद्ध रुपमा वार्ता हुँदै आएको छ । सोहि वार्ताको निरन्तरतास्वरुप अर्को चरणमा फेरि वार्ता हुन लागेको हो ।
यसैबीच, वार्ताका दिन बेलायती रक्षा मन्त्रालयबाहिर भेला भएर दबाब बढाउने योजना गोर्खाहरुले गरेका छन् । गोर्खा सत्याग्रह संघर्ष समितिकी महासचिव सइन्द्र केसी थापाले गोर्खाहरुको अधिकारको पक्षमा ऐक्यबद्धता जनाउन आवश्यक रहेकाले सबैको सहभागिताका लागि आव्हान गरेकी छन् ।
जसका लागि बिहान साढे १० बजे गोर्खा स्मारक अगाडि भेला हुन आग्रह गरिएको छ ।
