–एटा संवाददाता ।
फार्नबोरो । जीनर्जीले सन् २०२० सम्म करीब ३० हजार भन्दा बढी उपभोक्ता बनाउने लक्ष्य सहित अगाडी बढिरहेको जानकारी गराएको छ । गत शनिबार ४ अगष्टका दिन फार्नबोरोस्थित भिलेज होटलमा आयोजित पत्रकार सम्मेलनमा सो जानकारी दिइएको हो ।
बेलायतमा रहेका विभिन्न संचारकर्मीहरुको उपस्थितिमा आयोजित पत्रकार सम्मेलनमा जीनर्जी लिमिटेडका प्रमुख कार्यकारी अधिकृत मेजर (रि) टिकेन्द्र दल देवानले जीनर्जी कम्युनिटीमा आधारित पहिलो परियोजना भएको बताउदै करीब २०० जना नेपालीहरुको लगानी भएको जानकारी गराए । उनले कम्पनीले २४ जनालाई रोजगारको अवसर प्रदान गरेको, ग्राहकहरुलाई अत्यन्तै शुलभ र प्रतिस्पर्धात्मक मूल्यमा ग्याँस तथा बिजुली वितरण गरिदै आएको र नेपाली तथा हिन्दीमा भाषामा समेत ग्राहकहरुलाई सेवा दिदैं जनाए ।
सन् २०१३ को ५ डिसेम्बरबाट संचालनमा आएको कम्पनीले अहिले ११ हजार उपभोक्ताहरुलाई बिजुली र ग्याँस वितरण गर्दै आएको छ । जसमध्ये ८.३ प्रतिशत मात्र नेपाली ग्राहक रहेका छन् । कम्पनीले बेलायतमा रहेका नेपाली संघसंस्थाहरुलाई लोयल्टी समेत प्रदान गर्दै आएको छ । कुनै पनि संघसंस्थामार्फत कम्तीमा १० घर जीनर्जीमा उपभोक्ता बनाएमा त्यस्ता संघसंस्थालाई रोयल्टीवापत प्रतिघर २० पाउण्डको दरले बर्षेनी २०० पाउण्ड प्रदान गर्ने योजना बनाएको छ । हालसम्म संखुवासभा समाज, मगर बुद्धिष्ट सोसाईटी, स्यान्डर्स नेपाली कम्युनिटी र लुरोङ्ग राई समाजले रोयल्टी स्कीम अन्र्तगत ग्राहक बनाई लोयल्टी रकम लिइसकिएको जानकारी दिए । मेजर (रि.) देवानले एनआरएनए युकेको उदाहरण दिदै एनआरएनएमार्फत १ हजार घर उपभोक्ता बनेमा बर्षेनी २० हजार पाउण्ड लोयल्टी पाउने बताए । उनले आपूmहरुले प्रदान गर्दै आएको लोयल्टीको बारेमा बेलायतमा रहेका नेपाली संघसंस्थालाई पुनः जानकारी गराउने जनाए ।
कम्पनी संचालनको चौंथो वर्षसम्म आइपुग्दासम्म १ करोड २० लाख पाउण्ड कारोबार गरिसकिएको बताउदै सबै नेपालीहरुलाई लगानी गर्ने अवसर खुल्ला गरिएको समेत जानकारी गराए । उनले शुरुमा लगानी वा ग्राहक बन्न हिच्किचाउनु स्वाभविकै हो भन्दै अव आपूmहरु मूनाफातर्फ उन्मुख भएको हुँदा ढुक्क भएर लगानी वा ग्राहक बन्न अनुरोध गरे ।
‘जीनर्जी शुद्ध नेपाली कम्पनी हो’ र यसप्रति हरेक नेपालीले गर्व गर्नुपर्नेमा जोड दिदै अमेरिकी कम्पनी मसिनिस्ट्स युएसए इन्क तथा नेपालमा जल विद्युत क्षेत्रका उसका साझेदारसंग र वेल्समा पनि विद्युत उत्पादनको क्षेत्रमा सहकार्य गरिरहेको अवगत गराए ।
कार्यक्रममा अमेरिकी कम्पनी मसिनिस्ट्स युएसए इंकका युरोप प्रमुख डा. रेमण्ड डेभिस, वेल्सस्थित इनर्जी कम्पनी सिडवेल्थियो लिमिटेडका म्यानेजिङ्ग डाइरेक्टर वाइन क्रम्पटन, यूके नेपाल फ्रेण्डसिप सोसाइटीका सिइओ डा.एलन मार्सल सांकाले जीनर्जीसंगको सहकार्य र आपूmहरुको भूमिकाका बारे बोलेका थिए ।
गत २१ जुलाई २०१८ दिन सम्पन्नसाधारणसभाबाट निर्णय भएका कम्पनीको प्रगति विवरण तथा आगामी कार्ययोजनाहरुलाई जानकारी गराउने उद्देश्यले आयोजना गरिएको पत्रकार सम्मेलनमा कम्पनीका तपस गुरुङले प्रविधि, शिशिर गुरुङले भावी कार्ययोजना र विजय थापाले वर्तमान चुनौतीहरुका बारेमा जानकारी दिएका थिए ।
कम्पनीका सदस्यहरु, विभिन्न नेपाली संस्थाका प्रतिनिधि र संस्थागत ग्राहकहरुको बिशेष उपस्थिति रहेको पत्रकार सम्मेलनमा जीनर्जीका अध्यक्ष मेजर (रि.) कुलबहादुर थापाले स्वागत मन्तव्य दिएका थिए भने महासचिव रामलाल श्रेष्ठले कार्यक्रम संचालन गरेका थिए ।
