लण्डन १० अगस्ट २०२३ ।
बेलायत आउन हालसम्म ३९२ नेपाली नर्सले आवेदन दिएका छन् ।
नेपाल र बेलायतबीच भएको सम्झौताअनुसार वैदेशिक रोजगार विभागले स्वास्थ्य सहायकको रूपमा नर्सहरूका लागि आवेदन आह्वान गरेको थियो ।
विभागका महानिर्देशक मदन दहालले आवेदनका लागि ३९२ जनाले अनलाइनमार्फत इन्ट्री गरेको बताए । उनीहरूले अनलाइनमा आफ्नो प्रोफाइल बनाएका हुन् । तीमध्ये १० जनाको आवेदन नै परेर स्वीकृति समेत भइसकेको उनको भनाई छ ।
विभागले साउन ५ गते नर्सहरूलाई आवेदन आह्वान गरेको थियो । यसका लागि विभागको छुट्टै अनलाइन पोर्टल मार्फत आवेदन दिनुपर्ने व्यवस्था मिलाएको छ । सोही आधारमा मापदण्ड पुरा गरेका नर्सहरूले आवेदन दिन सक्नेछन् । त्यसका लागि १९ अक्टोबर २०२३ (२ कार्तिक २०८०) सम्ममा आवेदन दिने म्याद छ ।
बेलायतमा करिब १०० जना नर्स पठाउने गरी आवेदन आह्वान गरिएको हो । पाइलट प्रोजेक्टको रूपमा पहिलो चरणमा १०० जना नर्स पठाउने र त्यो सफल भएको खण्डमा थप नर्स पठाउने योजना दुवै सरकारको छ ।
