लण्डन १६ डिसेम्बर २०२३ ।
बेलायती राजकुमार ह्यारीले बेलायतको मिरर समूहका पत्रिकाहरुविरुद्धको फोन ह्याकिङसम्बन्धि बहुचर्चित मुद्धा जितेका छन् ।
उक्त पत्रिकाले प्रकाशित गरेका प्रिन्स ह्यारीसम्बन्धि समाचारहरुमा फोन ह्याकिङमार्फत् गैरकानूनी तवरले सूचना संकलन गरिएको ठहर गर्दै उच्च अदालतले शुक्रबार उनको पक्षमा फैसला सुनाएको हो ।
मुद्धामा राजकुमार ह्यारी पक्षले दावी गरेका विभिन्न ३३ मध्ये १५ अवसरमा पत्रिकाले गैरकानूनी माध्यमबाट सूचना लिएको पुष्टि अदालतले गरेको हो । आफ्नो पक्षमा फैसलापछि राजकुमार ह्यारीले ‘सत्य र जवाफदेहिताको लागि महत्वपूर्ण दिन’ भन्दै खुशी व्यक्त गरेका छन् ।
अदालतले राजकुमार ह्यारीले क्षतिपूर्तिबापत् १ लाख ४० हजार ६ सय पाउन्ड पाउने फैसला पनि सुनाएको छ । यसअघि मिरर समूहका पत्रिकाहरुले गैरकानूनी रुपमा फोन ह्याकिङ गरी आफ्ना नीजि गोप्य सूचनाहरु प्रकाशित गरेको आरोपसहित राजकुमार ह्यारी कानूनी उपचारको बाटोमा लागेका थिए ।
