लन्डन ३ मार्च २०२५ । गैर आवासीय नेपाली संघ (एनआरएनए) यूकेका पूर्वउपाध्यक्ष ५३ वर्षीय मोहन कार्कीको निधन भएको छ ।
केही समयदेखि फोक्सोको समस्याबाट पीडित कार्कीको सोमबार स्कटल्यान्डस्थित आफ्नै निवासमा मृत्यु भएको एनआरएनए यूकेले जनाएको छ । झापामा २९/१०/१९७२ मा जन्मिएका कार्कीको घर काठमाडौंमा कालिमाटी हो ।
कार्की एनआरएनए यूकेको दुई कार्यकाल उपाध्यक्ष (२०१९–२१, २०२१–२३), एनआरएनए स्कटल्याण्डको संस्थापक अध्यक्ष (२०१७–१९) रहेका थिए ।
उनी फोर्थ भ्याली नेपाली एशोसिएसनका अध्यक्ष, दुई कार्यकाल ग्लास्गो नेपाली एशोसिएसनको अध्यक्षसमेत बनेका थिए ।
एनआरएनए यूकेको नेपाली नागरिकता निरन्तर अभियानको संयोजकसमेत बनेका थिए कार्की । आपतविपत पर्दा कर्मभूमि बेलायत र जन्मभूमि नेपालमा अग्रणी रुपमा लागिपर्ने स्वभावका रहेको एनआरएन अभियन्ताहरु स्मरण गर्छन् ।
