लन्डन १० जुलाई २०२५ । तमुधिं यूके आमा समूहले क्यान्सरविरुद्धको जनचेतना र उपचारका लागि रकम संकलन गर्ने उद्देश्यले जुलाई १९ मा गिल्डफोर्डको स्टोक पार्कमा आयोजना हुने ‘रेस फर लाइफ’ कार्यक्रममा सहभागी हुने भएको छ ।
कार्यक्रमको आयोजनासम्बन्धी जानकारी दिँदै समूहकी अध्यक्ष कमलादेवी गुरुङले बेलायतवासी नेपाली समुदायलाई दौडमा सहभागिताका लागि आह्वान गरेकी छन् । ५ किलोमिटरको दौडमा महिला मात्र सहभागी हुन पाउने यो कार्यक्रम क्यान्सर रिसर्च यूकेले प्रत्येक वर्ष बेलायतका विभिन्न सहरहरूमा आयोजना गर्दै आएको छ ।
सन् १९९४ मा लन्डनबाट सुरु भएको ‘रेस फर लाइफ’ मा प्रारम्भमा ७५० महिलाले भाग लिएका थिए । समयसँगै यसको लोकप्रियता बढ्दै गएको छ, जसले करोडौं पाउन्ड संकलन गर्दै संसारभरका करिब २०० प्रकारका क्यान्सर रोगबाट पीडित महिला, पुरुष र बालबालिकाको उपचार र अनुसन्धानमा सहयोग पुर्याउँदै आएको छ ।
तमुधिं यूके आमा समूहले यो प्रेरणादायी कार्यक्रममा प्रत्येक वर्ष सक्रिय सहभागिता जनाउँदै आएको अध्यक्ष गुरुङले जानकारी दिइन् ।
