नेपाल तामाङ घेदुङका पूर्वमहासचिव सोमबहादुर घले तामाङलाई मातृशोक परेको छ । घलेका ७२ वर्षीया आमा प्रेमकुमारी तामाङको बुधबार बिहान करिब साढे ७ बजे बसुन्धरास्थित चिरायु अस्पतालमा निधन भएको हो । मृतक तामाङको शव बौद्ध परम्पराअनुसार अन्तिम संस्कारका लागि स्वयम्भू पुर्याइएको छ ।
दम रोगबाट पीडित प्रेमकुमारीलाई श्वासप्रश्वास गडबडी भएर केही दिनअघि अस्पताल लगिएको थियो । उपचारका क्रममा उनलाई निमोनिया भएको र मुटुमा समेत संक्रमण हुन पुगेपछि बचाउन नसकिएको चिकित्सकले जनाएको छ ।
मृतक प्रेमकुमारीप्रति अन्तिम श्रद्धाञ्जलि दिन सांसद, विभिन्न पार्टीका नेताहरु, इष्टमित्रलगायतको स्वयम्भूमा भीड लागेको थियो ।
