लन्डन । भूतपूर्व गोर्खा सैनिकहरुको समूह ‘इन्टेक १९९६’ ले प्रथम भीसी विजेता कुलबीर थापा अल्डरसटको प्रिन्सेस गार्डेनमा बनाउन लागिएको सालिकका लागि २ हजार ३ सय पाउन्ड सहयोग गरेको छ ।
मेजर जीत हमाल, क्याप्टेन दावानुरी शेर्पा, क्याप्टेन भीम शिरिष, डब्लुओटु भोलेन गुरुङ, कलर सार्जेन्ट प्रित गुरुङ लगायतले आइतबार एक कार्यक्रमबीच गोर्खा मेमोरियल प्रोजेक्टलाई चेक हस्तान्तरण गरेका हुन् ।
सालिक निर्माणका लागि करिब १ लाख २५ हजार पाउण्ड खर्च लाग्ने गोर्खा मेमोरियल प्रोजेक्टले बताएको छ । सालिक राख्ने ठाउँका लागि स्थानीय ग्रेटर रसमोर नेप्लिज कम्युनिटीले सन् २०१५ देखि रसमोर काउन्सिलसंग अनुरोध गर्दै आएकोमा गत वर्ष उपलब्ध गराइएको थियो ।
प्रथम भिक्टोरिया क्रस (भीसी) विजेता गोर्खा सैनिकथापामगरको सालिक सहयोगार्थ बेलायतका कयौं संघसंस्थाले सहयोग गर्ने क्रम जारी छ ।
