काठमाडौं कात्तिक २९ ।
प्रधानन्यायाधीश चोलेन्द्रशम्शेर जबराले राखेको संवादको प्रस्तावलाई नेपाल बार एसोसिएसनले अस्वीकार गरेको छ ।
नेपाल बार एसोसिएसनका अध्यक्ष चण्डेश्वर श्रेष्ठले आफूहरु जबरासँग वार्तामा नबस्ने बताएका छन् । अदालत परिसरमा आयोजित विरोध सभालाई सम्बोधन गर्दै बार अध्यक्ष चण्डेश्वर श्रेष्ठले अब प्रधानन्यायाधीशको विश्वास गर्न नसकिने बताउँदै पदबाट राजीनामा दिएर अहिलेको संकट समाधान गर्नु पर्ने बताए ।
नेपाल बार र सर्वोच्च बार दुबैले प्रधानन्यायाधीश जबरासँग वार्ता नगर्ने बताएका छन् । वर्तमान प्रधानन्यायाधीशको कारण नै अदालतमा भ्रष्टाचार र अनियमितता मौलाएको भन्दै न्यायपालिका शुद्धीकरणका लागि प्रधानन्यायाधीशको राजीनामा नै एकमात्र विकल्प भएको बारको ठहर छ ।
प्रधानन्यायाधीश जबराको राजीनामा माग गर्दै आन्दोलनरत कानून व्यवसायीहरुले सर्वोच्चको मूल गेटमा धर्ना दिएर अदालत प्रवेशमै अवरोध गर्न खोजेपछि प्रधानन्यायाधीश जबराले सोमबार एक वक्तव्य जारी गर्दै संवादमा आउन आग्रह गरेका थिए ।
