लण्डन डिसेम्बर ८ ।
बेलायतका नयाँ राजा चार्ल्स तृतीयको तस्वीर भएको मुद्रा पहिलोपटक प्रकाशन भएको छ ।
रोयल मिन्टले प्रकाशन गरेको पचास पेन्सको सो सिक्का बुधबारबाट चलनचल्तीमा आएको छ । पोष्ट अफिसका ९ हजार ४५२ वटा शाखाहरूबाट ती मुद्राहरू लिन सकिनेछ । ती सिक्काहरू करिब ४९ लाख पाउण्ड बराबरको निस्कासन गरिएको छ ।
सो सिक्काको डिजाइन मार्टिन जेनिङ्ले गरेका हुन् र उनको डिजाइनलाई राजदरबारले स्वीकृति दिएको हो । बेलायतमा सेप्टेम्बरमा महारानीको निधन पछि चार्ल्स तृतीय राजा बनेका छन् र महारानीको तस्वीर अंकित मुद्राहरू अब प्रतिस्थापन गरिँदैछन् ।
