काठमाडौं १२ अप्रिल २०२३ ।
कोशी नामाङकरण खारेजीको आन्दोलनका सहिद पदम लिम्बु लाजेहाँङको परिवारलाई ५ लाख नेपाली रुपैयां आज हस्तान्तरण गरिएको छ ।
सहिद लाजेहाँङप्रति सम्मान गर्दै युकेमा संकलित सो रकम आज मोरङको बेलबारी २ लालभित्तिमा एक कार्यक्रमको आयोजना गरी हस्तान्तरण गरिएको हो । प्रदेश न १ पुन नामाङकरण संयुक्त समितिको आन्दोलनलाई उर्जा मिलोस र सहिद लाजेहाँङको परिवारमा थोरै भएपनि सहानुभूति र सहिद प्रति सम्मान ब्यक्त गर्दै शुरु गरेको अभियानमा ९६ जना दाताहरुबाट ३,७३० पाउण्ड संकलन भएको विश्वासदीप तिगेलाले जानकारी दिएका छन् ।
उक्त रकमलाई नेरुमा रुपान्तरण गर्दा नेरु ६,०१,९४९ भएको त्यस मध्ये १ लाख सघर्ष समितिलाई हस्तान्तरण गरिएको बताइएको छ । कार्यक्रममा कुमार लिंगदेन मिराक र जेन्टल लावती लगायतको उपस्थिती रहेको थियो । गत चैत ५ गते विराटनगरमा नामाकरणको विषयमा भएको आन्दोलनका क्रममा प्रहरीको लाठी प्रहारबाट ४२ वर्षीय लिम्बुको मृत्यु भएको थियो ।
प्रदेश नं. १ को नामकरण छलकपटपूर्ण रुपबाट कोशी राखिएको भन्दै यूकेमा रहेका दर्जनौ संगठन आन्दोलित भएका छन् ।
