लन्डन १२ डिसेम्बर २०२५ । यूकेस्थित क्रेनिङटन आमा समूहले मानवसेवा आश्रम बागलुङ शाखालाई ५० हजार रुपैयाँ आर्थिक सहयोग प्रदान गरेको छ । बागलुङ शाखाको सेवा व्यवस्थापनलाई अझ सुदृढ बनाउन समूहको प्रतिनिधित्व गर्दै नेपाल आएकी चन्द्रमाया थापामार्फत सो रकम मंगलबार आश्रमलाई हस्तान्तरण गरिएको हो ।
सामाजिक उत्तरदायित्व र मानवीय सेवाप्रति समर्पणका साथ गरिएको यस सहयोगले आश्रमको सेवा कार्यमा थप ऊर्जा मिलेको आश्रमले जनाएको छ । परदेशबाट पनि मानवताको सेवामा हात अगाडि बढाएको भन्दै समूहलाई आश्रम परिवारले आभार प्रकट गरेको छ। मानवसेवा आश्रमले देशभर २९ वटा शाखा विस्तार गरी सडकआश्रित, बेवारिसे र असहाय व्यक्तिहरूलाई निरन्तर सेवा प्रदान गर्दै आएको छ।
मानवसेवा आश्रमले वि.सं. २०६९ साल भाद्र १३ गते मकवानपुरको हेटौँडाबाट औपचारिक रूपमा सेवा सञ्चालन गरेको हो।
