लण्डन असोज ३ ।
बेलायतमा कोरोना संक्रमणका कारण एक लाख ३५ हजार बढिको मृत्यु भएको छ ।
पछिल्लो २४ घन्टामा थप १६४ जना कोरोना संक्रमितको मृत्यु भएसँगै बेलायतमा कोरोनाबाट ज्यान गुमाउनेको संख्या एक लाख ३५ हजार १४७ पुगेको ‘डिपार्टमेन्ट अफ सोसल केयर’ ले जानकारी दिएको छ । पछिल्लो महिनामा बेलायतमा कोरोनाका कारण मृत्यु हुने दर ४७ प्रतिशत बढेको अधिकारीहरुले बताएका छन् ।
यसैगरी बेलायतमा पछिल्लो २४ घन्टामा ३० हजार १४४ जना नयाँ संक्रमित थपिएका छन् । नयाँ संक्रमितसँगै बेलायतमा संक्रमितको संख्या ७४ लाख नाघेको छ । केहि समययता बेलायतमा दैनिक संक्रमितको संख्या ३० हजार भन्दा माथी रहँदै आएको छ । बेलायतमा हालसम्म ९ करोड २९ लाख भन्दा बढीलाई कोरोनाविरुद्धको खोप दिइसकेको सरकारी तथ्यांकले देखाएको छ । जसमध्ये ४ करोड ८५ लाख ४८ हजार भन्दा बढीले पहिलो डोज र ४ करोड ४३ लाख ५७ हजार बढीले खोपको दुवै डोज लगाइसकेका छन् ।
कोरोना संक्रमणका कारण पछिल्लो २४ घन्टामा ९३२ जना अस्पताल भर्ना भएका छन् । यसैगरी उपचारार्थ अस्पताल भर्ना भएकामध्ये ८ हजार ६८ जना अस्पताल बेडमा छन् भने एक हजार २० जनाको भेन्टिलेटरमा राखेर उपचार भैरहेको छ ।
